Sunday, August 7, 2011



സൗഹൃദം

പെരുമഴക്കാലത്ത്
കുതിരാന്‍ മലയുടെ ചോട്ടില്‍
നനഞ്ഞ മണ്ണില്‍
ഒരു കുപ്പിക്കഴുത്തിലെ
സ്നേഹ ചുംബനങ്ങളില്‍
നുരഞ്ഞോഴുകിയ
ഒരു കവിള്‍ ബിയറിന്റെ
സൗഹൃദം

അക്വേഷ്യ മരങ്ങള്‍ക്കിടയില്‍
കരിയില കരഞ്ഞ ത്രിസന്ധ്യയില്‍
അധരങ്ങളില്‍
ആദ്യ ചുബനത്തിന്റെ
മധു പകര്‍ന്നേകി
ഓടിയൊളിച്ച
പാവാടക്കാരിയുടെ
സൗഹൃദം

ഉത്സവപ്പറമ്പിലെ
ആള്‍ക്കൂട്ടത്തില്‍
വിശ്വാസ പ്രമാണങ്ങള്‍
കൊമ്പ് കോര്‍ത്തപ്പോള്‍
ചക്രവ്യുഹതിലകപ്പെട്ട
അഭിമന്യുവെപ്പോല്‍
നിരായുധനായി നില്‍ക്കവേ
ഓടിയെത്തി തോളോട് തോള്‍ ചേര്‍ന്ന്
ചോരചിന്തിയ ചങ്ങാതിയുടെ
സൗഹൃദം

ജിബൂഷ്യന്‍ മരുഭൂമിയില്‍
ആഫ്രിക്കന്‍ തീക്കാറ്റ്
മരണം വിതക്കുമ്പോള്‍
ഒരു കയ്യില്‍ മരണവും
ഒരു കയ്യില്‍ പ്രണയവുമായി
മനസ്സില്‍ കുടിയേറിയ
ദ്രാവിഡ സുന്ദരിയുടെ
സൗഹൃദം

സൗഹൃദം സൗഹൃദങ്ങളില്‍
പൊട്ടി വളരുന്ന
ഭൂലോക വലയില്‍
ഇന്നലെ
രാത്രിയില്‍
മാറിലെ മറുക് കാണിച്ചു
ഇത് നിനക്കിഷ്ടമായോ
എന്നുറക്കെ ചിരിച്ച
ഇജീപ്ഷ്യന്‍ സുന്ദരിയുടെ
സൗഹൃദം

സൗഹൃദം വളരുകയാണ്
ചക്രവാളങ്ങളോളം,
വന്‍കരകളില്‍ നിന്ന്
വന്‍കരകളിലേക്ക്,
ഇടമുറിയാതെ
നിലക്കാതെ,
ഒഴുകുകയാണ്
ഒരു നദി പോലെ

2 comments:

  1. സൗഹൃദം വളരുകയാണ്
    നിലക്കാതെ,
    ഒഴുകുകയാണ്
    ഒരു നദി പോലെ

    ReplyDelete
  2. neelunna ...ozhukunna nadiyileppozho nammalum....

    ReplyDelete